O alcalde das Somozas, Juan Alonso Tembrás, acompañado por membros do goberno local, recibiron hoxe á delegada territorial da Xunta de Galicia en Ferrol, Martina Aneiros. Na visita desta mañá coñeceron a unha das traballadoras contratada polo Concello das Somozas para desenvolver tarefas agrícolas e de mantemento de espazos verdes. A Xunta apoia este ano a contratación de 13 persoas mozas desempregadas en 10 concellos das comarcas de Ferrol, Eume e Ortegal con cargo ás axudas do Programa de Garantía Xuvenil da Consellería de Emprego, Comercio e Emigración.
Esta axudas teñen o obxectivo de incentivar a contratación de persoas mozas, de entre 18 e 29 anos, desempregadas -é requisito que sexan beneficiarias do Sistema Nacional de Garantía Xuvenil e estean inscritas no Servizo Público de Emprego de Galicia- tanto en entidades locais como en organismos intermedios sen ánimo de lucro.
Xunto ao Concello das Somozas tamén beneficiáronse destas axudas o de Pontedeume, Ortigueira, Moeche, Fene, Cerdido, Cedeira, Cariño e Ares, cun contrato por concello; así como o de Ferrol, que recibiu aportación para subvencionar a contratación de catro traballadores.
O programa de Garantía Xuvenil forma parte da aposta da Xunta por fomentar o emprego das persoas mozas dentro do que se inclúen outras medidas como como as encadradas na próxima orde Galicia Suma Talento: Emprégate, os programas de primeira experiencia profesional e Investigo, entre outras.
