• Están dirixidas a aquel alumnado que estea a cursar estudos en Educación Infantil, Primaria, Secundaria, FP Básica, Bacharelato e para gastos de desprazamento para o estudantado de Ciclos Medios, Superiores e Universidade. 

Un ano máis, o Concello das Somozas convoca unha liña de axudas a familias para material escolar no curso 2025/26. Están dirixidas a aquel alumnado que estea a cursar estudos en Educación Infantil, Primaria, Secundaria, FP Básica, Bacharelato e para gastos de desprazamento para o estudantado de Ciclos Medios, Superiores e Universidade.

O obxectivo prioritario desta acción é promover o principio de igualdade no exercicio do dereito á educación, e compensar ás familias para facer fronte aos gastos derivados da escolarización dos seus fillos e fillas matriculados e matriculadas nos ámbitos mencionados anteriormente.

Abranguerá libros escolares; os de lectura que sexan necesarios durante o curso académico; material funxible (bolígrafos, cores, libretas, folios, rotuladores…); mochilas, estoxos e neceseres; material e libros específicos para o alumnado con necesidades especiais, material informático (tinta de impresora ou memorias USB); no caso de Ciclos Formativos, material específico que teña relación coa especialidade que se curse; material incluído na listaxe de Educación Infantil distinto de material funxible (toallitas húmidas e panos); no caso de estudantes de Ciclos Medios ou Superiores e Universitarios, o concepto específico que se subvenciona é o de desprazamentos.

As persoas beneficiarias deberán estar empadroados/as no Concello das Somozas, polo menos un dos pais/nais ou tutores legais, así como as/os alumnos/as para os que se solicite a axuda. No caso de alumnas/os maiores de idade que soliciten a axuda será suficiente con que estea empadroado/a no Concello das Somozas.

As solicitudes poderanse presentar desde o 26 de agosto e ata o 30 de setembro de 2025 a través da Sede Electrónica do Concello ou presencialmente no rexistro do Concello. As solicitudes presentaranse xunto coa documentación correspondente no Rexistro Xeral do Concello ou na Sede Electrónica do Concello das Somozas, empregando o formulario correspondente.

Consulta as bases reguladoras da convocatoria no BOP aquí.