A andaina saudable prevista para o 9 de maio cambia de data debido á previsión meteorolóxica adversa, sendo a nova data o 30 de maio. A modificación é debida á previsión de choivas e co obxectivo de garantir unha mellor experiencia.
Esta andaina saudable con ruta circular pola zona da Igrexa está deseñada para conectar o corpo e a mente mentres gozamos da nosa contorna. O punto de saía mantense desde o aparcamento do Centro Cívico Sociocultural das Somozas ás 9:30 horas.
Esta actividade non é só un roteiro xa que durante o percorrido poñerase en valor seis piares fundamentais para unha vida saudable: a actividade física e o movemento, a alimentación consciente, a importancia de durmir o suficiente, o contacto directo coa natureza e a luz natural, a práctica da respiración e o control do estrés, e o valor das relacións sociais.
A ruta circular proposta ten unha distancia de entre 8 e 9 quilómetros cun nivel de dificultade medio, o que a fai ideal para persoas afeitas a camiñar. A previsión é completar o traxecto e regresar ao punto de partida sobre as 12:30 e as 13:00 horas aproximadamente.
As inscricións xa están abertas e poden realizarse presencialmente no recinto polideportivo multiusos As Somozas, chamando ao teléfono 618 416 994 ou enviando un correo electrónico a [email protected].